Minister hian July ni 10 khan Pralhad Joshi, Union Minister for Consumer Affairs, Food and Public Distribution chu a chennaah hmuin National Food Security Act chungchangte leh Consumer welfare lama nasa zawka hmalak dan tur a sawipui a ni. B. Lalchhanzova hian Mizoramah NFSA hnuaia awm tur awm silo engemaw zat awmte chu an awm ve theih nana hmalakpui turin a sawi.

July ni 11 ah Department of Food and Public Distribution Secretary Sanjeev Chopra leh Department of Consumer Affairs Secretary Nidhi Khare te hmu lehin Union Minister nena an inkawmna thute hi a bawhzui nghal a. NFSA quota tihpun chu India rampuma Household Consumption Expenditure Survey data te uluk taka zirchian a nih hnua ngaihtuah ṭhat tur a nih thu leh chu chu hun rei vak lovah hrual mum a nih a beiseiawm thu DFPD Secretary hian a sawi a ni.

B. Lalchhanzova chuan consumer awareness leh rights chungchangah Mizoramah chuan consumer-te hi hmun dang aia an inthlarun avangin a bik taka ngaihtuah an ngaih thu a sawi chu DOCA Secretary chuan Minister hi proposal thehlut turin a lo rawn a ni. 

July ni 11 vek hian Minister chuan Chanchal Singh, Secretary, Ministry of Development of North Eastern Region chu hmuin Land Revenue & Settlement Department tih changtlunna tur hrang hrang ruahmanna Mizoram sawrkarin a neih te chu tih hlawhtlin a nih theih nana theihtawp chhuahpui turin a sawm a. Chanchal Singh, Secretary MDoNER chuan Minister thu thlente chu ṭha a tih thu leh tih hlawhtlin theih thilte an nih hlawm avangin proposal a luh hunah pawh a lo chhinchhiah tur thuin a chhang a ni.

July ni 12, 2024 khan Budge Budge, Kolkata-a Hindustan Petroleum Corporation Limited Oil terminal chu a tlawh bawk a. Minister chuan Mizoramah hmasawnna tam tak thleng mek zelin; heng avang hian tuialhthei mamawhna pawh a sang chho zel a. Hemi vang hian HPCL hotute chu petrol retail outlet tam zawk Mizorama bun belh turin a ngen rualin khuarel chhiatna leh buaina dang a thlen thulha Mizoram a tuialhthei stock a awm theih nan Minister-in HPCL te Oil Depot siam tura a lo sawipui tawh pawh HPLC lam hian a rang thei anga bera a hmun tur enfel a, hmalak thuai an tum thu an lo hrilh bawk.